تعباية البنزين منا شطارة وحبة الدواء منا بطولة وكيلو اللحمة منو فخفخة
كتبت عضو اللجنة التنفيذية في حزب الكتلة الوطنية اللبنانية السيدة ميريام الصيّاح تفنكجي عبر صفحتها على موقع "فايسبوك" التالي:
"في إيام بتحسّ فيها انو خلصت الدني...
بينقطع النفس وبصير كل خبر وزنو متل الصخرة على قلبك...
أبشع شعور هوّي الفشل، والأسوأ لما تحسّ انو فشلت بأكبر مهمّة، لما يفتشوا اولادك بعيونك عن طمأنينة وما يلاقوها او لما يسألوك عن بكرا وانت منك عارف اليوم شو رح يصير...
عشنا الحرب لما كنا صغار وكبرنا رافضين الانخراط بالعنف، لنكتشف انو الحرب النفسيّة والتحطيم المعنوي الممنهج أكثر خطورة وفتك من كل الإعتداءات!
خيبة بعد خيبة، عم يسحبوا الحياة منا وعم يطفو العنفوان اللي بروحنا، عم يقتلوا الأمل ويستبدلو بسوداويّة وانكسار... يوم بعد يوم عم يبيعونا صمود مطعّم بمبادرات وسيناريوهات حلول.
بس انا تعبت من مرونة اللبناني وصرت عم فتّش على قهرو ووجعو وخيبتو بركي لما يحطّن قدام عيونو بيتذكّر انو تعباية البنزين منا شطارة، وحبة الدواء منا بطولة، وكيلو اللحمة منو
فخفخة، وغيرن كتير من الانجازات الواهية منلتهي فيا ومننسى نفتّش عن غضبنا، ونعبّر عنو بوجّ كل حدا وصّلنا للبهدلة والذلّ اللي وصلنالوا. بيكفي بقا صمود، خلينا ننكسر بقا!".






