خبِّر عن هالقصة وقول انو شيعي من جنوب العراق قصد ستّنا مريم بهالكنيسة وهيي حققتلو طلبو
كتب جورج سامي القدّوم عبر صفحته على موقع "فايسبوك" التالي:
"بدي خبّر عن حادثة صارت معي الليلة، وبصراحة كنت مردد اذا بكتبا عالفايسبوك، بس رجعت قررت انو لازم تنكتب.
كنت عم بزور سيدة الميسة (الأم الفقيرة)، وانا وفالل بلتقى بزلمي ومعو مرا محجبة وولد صغير فايتين يزوروا. بيستوقفني هيدا الزلمي وبيسألني اذا انا من المنطقة، فبقلوا ايه، عايزك شي، بقللي لاء بس بدي خبرك خبرية صارت معي من اكتر من سنة:
"انا شيعي من العراق، وانا وزوجتي كان عنّا مشكلي بالانجاب، وبقينا فترة طويلي بلا ولاد. من اكتر من سنة او سنة ونص جينا عجبيل وشفنا هالكنيسي (هيي مزار ولكن هو ما بيعرف الفرق)، فدخلنا زرنا وطلبت من العدرا انو يجينا ولد، وبعدها سافرنا عبلدنا، وحبلت زوجتي واجانا هيدا الولد، وهلق جايي اشكرا وجايب ابني عباس معي. انا يا خيي مش من الدين المسيحي الكريم والعدرا اتكرمت عليي وحققتلي طلبي"، وشلح من اجرو وقعد عالمقعد.
قلتلو انا "يا اخي يللي بيجي عند العدرا بكل ايمان، العدرا ما بتردّوا خايب بغض النظر عن دينو".
صراحة يمكن كان لازم صوروا توثّق هالخبرية بس من كترة ما تأثرت ما عدت فكرت الا بإيمان هيدا الزلمي المسلم الشيعي ورحمة وحنان العدرا.
قلتللو اسمالله وخليلك هالولد وودعتو.
انا وفالل بعيطللي وبقللي: "بدي اطلب منك شي، خبِّر عن هالقصة وقول انو شيعي من جنوب العراق قصد ستّنا مريم بهالكنيسة وهيي حققتلو طلبو، بطلب منك تخبّر كلّ لبتعرفن"، سألتو شو الاسم الكريم، قللي "انا "ميتم" شيعي من جنوب العراق"، قلتللو زيارة مقبولة، وفليت.
ما إلي بالعادة شارك قصصي، ولكن اصرار هيدا الزلمي وقديش اثرّت قصتو فيي، وكيف وقفّني انا وفالل، لا بعرفو ولا بيعرفني بس تيخبرني عن قصتو، خلّوني حسّ انو من واجبي عمم هيك خبرية. وسلام".





